Polos Creativos na Laboral: O alumnado de 4º ESO de Intelixencia Artificial deseña e prepara a súa participación no proxecto CanSat

O alumnado de 4º de Educación Secundaria Obrigatoria está a participar este ano no emocionante reto do CanSat, un proxecto educativo pertencente á ESA (European Space Agency) e enmarcado no programa Polos Creativos. Esta actividade ofrécelles a oportunidade de desenvolver as súas habilidades en ciencia, tecnoloxía, enxeñaría e matemáticas (STEM), ao tempo que traballan en equipo para deseñar, construír e lanzar un satélite simulado dentro dun pequeno envase.

Ao longo deste trimestre, o alumnado estivo inmerso no proceso de creación do seu CanSat, comezando polo deseño da cápsula mediante impresión 3D. Este paso permitiulles aplicar os seus coñecementos en deseño e tecnoloxía para crear un envase robusto pero lixeiro, capaz de soportar as esixencias do lanzamento e as condicións de voo. Ademais, dedicaron tempo á fabricación do paracaídas, unha peza esencial para garantir que o CanSat descenda de maneira controlada e segura.

A competición contará coa participación dos tres equipos do centro: “Los Tiesos”, “Os Barreiros” e “Team Wason”, que seguen traballando nos detalles dos seus deseños.

Próximamente levarase a cabo un lanzamento de proba dos CanSat, momento no que o alumnado poderá comprobar se as súas creacións cumpren cos requisitos de velocidade e tamaño establecidos para o desafío. Será unha oportunidade clave para poñer en práctica todo o aprendido e ver en acción os seus deseños.

Este proxecto non só favorece a aprendizaxe de conceptos científicos e tecnolóxicos, senón que tamén promove o traballo en equipo, a creatividade e a resolución de problemas, competencias fundamentais para o desenvolvemento profesional e persoal do alumnado.

Estamos moi ilusionados por ver como se enfrontan a este reto e desexámoslles moita sorte no lanzamento!